قصة الشجاعة اية كعبية قصة الشجاعة اية كعبية

قصة الشجاعة اية كعبية

"ثلاثة سنوات

ما يُقارب 6540 إبرة فحص 
3600 إبرة انسولين خلال سنتين
سنة واحده مع المضخة
وأربع أشهر مع الشجعان 
انضغطت ببداية الإشي ..
فكرت إنه تدمرت حياتي 
-سكري ؟ لا ، بعيد الشر ! 
-ممكن في غلط ، اتأكد!
-طب ليش ؟ وكيف ؟ شو السبب ؟ شو علاجه ؟ ممكن تطيب ؟ ممنوع اوكل شوكلاطة بالمره ؟ وكيف أتخلص منه ؟ 
-أكيد أكيد من كثر ما كنتي توكلي شوكلاطة !!
كل هالاسئلة وغيرها إجت براسي وبراس اهلي هذيك اللحظه .
وصرت أدعي إنه يكون في غلط ، ضعفت للحظه بعدين توضحت الصوره وعرفت شو يعني سكري!
- السكري مش موت وتقطيع وعجقه ، السكري مش معناه انه خلص ستوب شوكلاطة وسُكر ، السكري بالمره ما بيعدي ، تقدري تتجوزي وتخلفي وولادك ما يكون عندهن سكري بالعكس مممن يطلعو مُختصين سُكري ، السكري مش عيب ومش حرام ومش كارثه ولا نهاية الكون ، واشي طبيعي مش نيزك ، السكري هو اكثر اشي عمل بحياتي اثارة وصارت حياتي عبارة عن مغامرة الي فيها انا والسكري نتخطى الصعاب ، مرّات أحسه جندي بحياتي وسلاحي و مرات ازعله أو يزعلني بس بالاخر مجبورين نتصالح ومجبورين نكون متوازنين ماسكين إيد بإيد وماشيين ، المعاهده الوحيده اللي وقعناها عشان تدوم صحبتنا هو إنه ممنوع يوطى وممنوع يعلى وإلا نخسر بعض وأنا بدونه بطلت أقدر أكون . 
تعودت إنه بكل لحظه لازم أكون متوازنة ، لازم دايماً أكون الشجاعة وجاهزه للكلمات والاطرائات الحلوة من دكتورة السكري ،
لازم بس أشوف الفحص احس بالفخر والقوة
يمكن غريب بس السكري هو الإشي اللي زاد ثقتي بنفسي وأعطاني قوة شخصية وإرادة وشُحنات من الطاقات .
السُكري اعطاني سبب عشان اتحدى كل اشي صعب ونخلي أهون مع بعض مهما كانت صعوبته .
على خصري دايماً في جهاز إسمه مضخه ! 
بس هاي المضخة مش عيب ، محدا يحكيلي خبيها بالعكس لازم بس تشوفوها تقولولي إنتِ أشجع شُجاعة خليها عشان لما يشوفوها الأطفال السُكريين يعرفو إنه في كثير أشخاص مثلهم ، ممكن تكون سبب بشجاعة طفل مُحبط من السُكري .
لا تقلي سلامتك !
ولا تقلي يا حرام !
قلي ما أجمل شجاعتك وما أجمل الحياة لما نحارب عشانها .
يومت تلاقيني آكل كوم اكل ومعي زيرو لا تصفن فيي !
اوعى تخاف تسألني عن السكري مش رح أزعل ولا اخاف ولا رح انجرح بالعكس بصير أشجع وأقوى هاي الأسئلة تخليني أحس إنه السُكري عنجد موجود وإشي مُثير للإهتمام ،لا تخجل من أي شي ممكن يصير بجسمك ، شخصياً ممكن صرت أحب الطب والتمريض من تفاصيل السُكري والعمليات الشجاعه اللي تصير بجسمي .
خلي ببالك إنه بالمره مش سهل مش سهل تكون نايم فجأه تصحى ترجف وعرقان وعيونك مغبشات لإنه السُكري زعلان منك مش سهل بس مش مستحيل ، الحلو إنه بعد كُل زعل تروح تراضيه وتعطي سُكر وترجعو تنامو مبسوطين مثل عيلة صغيره بعد ما يخلص الحرب .
كثير كثير اوقات الإنسان السُكري يتعب ، حتى أنا ، بس لما بتذكر انه مش بس أنا الوحيد اللي عندي سُكري وإنه في غيري مليان سُكريين وحتى أطفال ، كمان في إنسان عظيم إسمه شادي الإيد اليمين للشجعان ، والشجعان الي هني مثلي بحسوا زي ما بحس وعايشين كل واحد مع سُكري خلص فيه . 
احنا شجعان مش بس اسم !
لا احنا شجعان بكل معنى الكلمة 
احنا كُل يوم ولحظه نكافح عشان نحافظ على سُكري متوازن ما نسمحله يوطى لإنه مكانته أعلى وكمان ما نسمحله يعلى عشان ما يكبر علينا وبحالة وطى أو على نعرف كيف نسعفه ونتحكم بحالنا ونوازنه بسرعه يا إما بجُرعة سُكر أو جُرعة إنسولين .
نعرف كيف نحافظ عصحتنا ونعرف كيف نحارب الحياة مع السكري ، ولا مره كرهت السُكري لا ما بكرهه بس كمان بتمنى من كل قلبي يلاقوله علاج ، ولو شو ما صار اهم اشي الشجعان ما يفترقوا بعد ما صارو عيلة كبيرة يجمعهم السُكري . 
وملاحظه أخيره لازم تعرف إنه إحنا الشجعان نعالج حالنا بحالنا مش بحاجة دكتور إحنا أطباء أنفسنا."